高密度發展+綠化地維護=宜居香港
上周《經濟學人》發表咗一篇好另類嘅世界「宜居城市龍虎榜」，點解謂之另類？因為佢破天荒咁將香港列於首位，優於倫敦（12名）同紐約（16名）之餘，更遠遠拋離亞洲對手新加坡（22名）同上海（33名）！如何會有咁出人意表嘅結果呢？唔係個個都話香港係文化沙漠、遊行之都、熱島煉獄、劏房圍城、兼烏煙瘴氣嘅咩？點解唔係其他宜居城市榜常見嘅溫哥華、蘇黎世、墨爾本、維也納嘅？原來《經濟學人》為改良佢嘅宜居指數而增加咗一個新指標，就係「空間元素」啦，而且呢個指標嘅比重更達25%之多，香港又喺呢項上獨佔鰲頭，大殺四方，呢個特性亦係筆者喺過去多次談及應該發揚光大嘅香港高密度發展優勢（見2010年1月「香港應否繼續行高密度發展模式？」及「再論香港人口密度」）！
將空間元素再細分有七個標題【表】：
一、綠化空間：香港高密度發展嘅結果就係市區人口密集，但係因而保存郊野綠化地帶，令幾乎所有市民都可於數分鐘車程、甚至步程內進入大型嘅市肺或野外，享受清新嘅空氣及綠油油嘅景觀，筆者甚至認為香港嘅評分應可與倫敦看齊！
二、城市伸延：香港可愛之處在於佢嘅高山淺海塑造咗城市發展嘅極佳天然邊界，令城市嘅擴展向上而非向外伸延，以至除咗界限街以南嘅市區外，幾乎全部與青山綠水相鄰。但係丁屋政策嘅嚴重失控卻為我哋樹立咗極壞嘅榜樣—由Google Maps清楚見到，西起藍地、洪水橋至大棠，東至錦田、八鄉嘅香港城規「亂葬崗」，冇將我哋嘅分數拉低已經偷笑，希望未來政府切勿再亂劃丁屋地皮，無論丁屋政策如何收科，都應該將呢幾區嘅地積比率大大提高，令到未來嘅住屋供應喺新界北亦向上發展，而唔係碌薄餅咁無限侵蝕綠化地帶！
三、自然資產：香港得天獨厚，四周高山大海，河流樹林無一缺乏，加上自己市內嘅地質公園更打入世界級地質公園行列，令呢個標題下亦奪高分；
四、文化資產：雖然香港文化一向被評缺乏多元及質素，但係得分低於阿姆斯特丹及北京，則稍嫌苛刻！起碼我哋有藝術節、電影節、ArtHK、愈趨活躍嘅藝廊群、自己嘅世界級中西樂樂團、話劇、粵劇、歌劇團等等，更遑論目不暇給嘅到訪藝團，以及一水之隔、處於澳門愈趨繁忙嘅流行文化表現節目！
五／六、連接性／隔絕度：好難想像本港嘅連接性會輸俾阿姆斯特丹同多倫多，尤其係如果將深圳視作香港嘅第二機場嘅話。此欄應有加分空間也；
七、污染：罪有應得，拍馬要追！
以上可見，香港真係福地也，唔怪之得愈來愈多中外機構／個人來港發展、定居。我哋如要維持呢個城市嘅優勢，只可繼續向高密度發展，將寶貴嘅公共休憩綠色空間保存，喺城市規劃時大膽咁提高未來新發展區嘅地積比，寧願多啲8倍嘅地區，亦勿濫批0.5倍嘅低密度地皮，寧終止丁屋地嘅泛濫，取而代之以5至8倍喺現成丁屋區上重建，令元朗區嘅眼冤市容升格。
中天
letstalkproperty@gmail.com
http://chungtinproperty.blogspot.com/
沒有留言:
發佈留言