2011年12月20日
土地活化力度欠奉 經濟轉型天方夜譚
周末有一則令人無限唏噓嘅新聞，就係地政總署逼某牛頭角舊工廈業主終止與Hidden Agenda租約。Hidden Agenda何者也？佢係一個連Time Out雜誌都點名讚之為「香港最佳表演場地」嘅獨立音樂表演場地（http://www.hiddenagendahk.com/），亦係西九文化區呢個官僚指使，中央計劃之形象大白象工程所無法複製嘅、香港本土產生嘅一個發酵創意、孕育新曲、領導潮流嘅非主流音樂「聖地」！雖然特首話要發揚創意產業，支持本土藝壇，可惜就算起十個西九文化區，都怕聚集唔到Hidden Agenda所能產生嘅有機能量：自2009年至今，喺該場地表演過嘅本地樂隊有233支之多！包括唱《Donald Tsang, please die》及《瓜分林瑞麟三十萬薪金》等曲目出名嘅My Little Airport。
此外，大陸及海外來港表演嘅樂隊都有62支及96支之眾，隨時連紅館同文化中心加埋都冇佢咁多！
官僚捨難取易 執法欺善怕惡
以上呢則可悲嘅新聞，在在證明發展局及屬下嘅規劃署／地政總署既無長遠視野（見下段），執法上更是擇弱而噬，毫無風度與深度：
一、林鄭局長不務正業，接近強搶私人住宅小業主嘅財產（景賢里是也）之餘，更要納稅人為佢數以十億嘅遊戲埋單；
二、喺市區重建上獨沽一味，用人唯己，令香港喺土地利用及建築設計上屢失騰飛良機：中環街市已經醫死病人，睇怕政府山亦會因過度官僚介入而要壽終正寢；
三、新界違規用地遍地開花：貨櫃式住宅如雨後春筍般蠶食綠野農地、村民霸佔官地無日無之，地政官員卻龜縮冷氣間，唔敢面對兇惡刁民，就算捉到犯法例子卻又唔思考點樣加重刑罰以儆效尤，結果導致公共土地大量流失，大好綠色郊野淪陷為不堪入目嘅「棕色地塊」；
四、喺市區就驕橫跋扈，無聊到連改裝窗都要批准、連一個單位有兩個露台都話違法（讀者如有其他白癡規劃／建築條例嘅例子歡迎來函，畀筆者另文數之），喺新界就唧一聲都冇，最終前者死寂如病房，後者混亂若葬崗；
五、不可不提嘅當然就係政府喺追打毫無反抗力嘅，毫無傷害性嘅利群活動（如Hidden Agenda音樂場所）時就不遺餘力，至死方休。明眼嘅讀者會唔會覺得呢個政府已經走火入魔、情理盡失？
85%樓面轉用途 嚴執法不如改規劃
本港製造業人口比例已由80年代之54%，跌至現在嘅6.7%【圖中藍線】，但係工業樓宇面積卻仍佔去今日非住宅樓宇嘅44%之多【圖中綠線】，即係工業樓面嘅供求水平已由80年嘅大致平衡勁插至今日嘅八成半廢置（或用作非工業用途）；就算以寬鬆嘅定義（即包括埋出入口同運輸行業【圖中紅線】）界定工業用途，都有起碼兩成以上嘅工業樓面現正用作非工業用途！
由此可見，自1992年後，本港早應該全面檢討「工業樓宇」用途嘅去留問題（見筆者另文：「紓解樓市供求失衡工業樓須更快鬆綁」），而家亡羊補牢都好過再拖延落去，最簡單嘅做法就係豁免全港所有工業樓宇，准許作住宅及酒店以外嘅任何用途，全面解封市場嘅活力。此舉愈早實行，就愈快減低本港零售、辦公樓宇嘅成本，增加本港經濟嘅活力及競爭力，隨時成為本屆政府少得可憐嘅德政之一！
各位不妨趁聖誕新年期間去Hidden Agenda體驗一下，就算香港失去另一個活力嘅源頭，大家都唔會死得不明不白……
中天
letstalkproperty@gmail.com
http://chungtinproperty.blogspot.com/
