限呎限量地政策對港人唔住
每逢運輸及房屋局公布新一季嘅私人住宅一手市場供應數據時，總會有一大堆人大放厥詞，如：今季較舊年升幾多成啊，又係幾年嘅新高啊，之類，但係各位就好少見到分析話供應總量係唔係過少，政府點解攬住晒啲地唔賣，等等。依家政府又製造多咗一個機會畀地產專家表演一番，就係似乎每季將要公布嘅未來三個月賣地計劃：喺過去一個周末令各專家「大飽口福」也……最令人失望嘅係屢勸不聽、屢析不辯嘅糊塗政策（至於係邊個政客先提議，就可能要各讀者幫手抽佢出來，再教育一番）竟然愈來愈被當係靈丹妙藥！呢項令人哭笑不得嘅「德政」，就係「限呎」同佢嘅孖生兄弟「限量」啦。令人懷疑到底發展局認為自己嘅職責係「政治交數」，定係為本港未來城市優化、發展謀福。
何出此言？有數得計也：根據聯合國統計數字，香港喺1993年時嘅人均居住面積只有76方呎，比北京（100方呎）、東京（170方呎）、首爾（200方呎）、新加坡（215方 呎）、倫敦（343方呎）、多倫多（442方呎）、墨爾本（546方呎）同華盛頓（739方呎！）真係有天淵之別。就算如筆者推算，香港係過去多年因家庭人數減少而間接令私人市場人均居住呎數增約26%，但係計埋公營房屋後，隨時90方呎都未到，令港人以面積計嘅居住環境繼續與非洲嘅馬拉維及津巴布韋之流為伍。
由此可見，點解起限呎樓係錯誤嘅政策，因為咁會繼續將國際精英趕去新加坡、上海之餘，並有三個更大嘅副作用：①令樓宇供應結構更偏向「白鴿籠」，令港人未來毫無換大樓改善居住環境嘅選擇【附圖中紅虛線】；②就算小業主上咗車，買咗個細單位，佢因為政府供應嘅扭曲市場，令大單位價格飆升更勁（少數量，多人要換樓也），但係當大家都想將手上喺市場上多到無人要（因為大家都結婚生仔請菲傭，迫住要「沽細買大」）嘅蚊型「限呎」單位甩手時，卻發現供求不衡下，無可能賣到好價，更加劇「醫生律師買唔到樓」嘅怪象！③豪宅因供應嚴重短缺，價錢更加坐火箭，更減低社會流動性，令仇富情緒更高漲，更令政客有藉口復建居屋（再扭曲市場多次）……
此所以點解依家政府嘅土地供應計劃完全失去期望管理作用（見4月12日拙文「土地供應當務之急 四萬單位非賣不可」），無法為供應短缺現象釜底抽薪之餘，更奪去市場提供市民需要嘅產品（即大量嘅大呎數單位）以減低樓價嘅兩極化【靠向圖中藍虛線】嘅能力，認真吃力不討好！
中天
letstalkproperty@gmail.com
http://chungtinproperty.blogspot.com/
