2011年10月25日
選舉期票開到丁屋？雙英應向市民攤牌
上個禮拜評述施政報告嘅「超錯」大轉軚，由否定私人市場（搶奪私樓供應去「發」大鞭長莫及、天生缺陷、已經臃腫不堪嘅公營樓宇），到鼓勵賭博（政府打本兼包底，畀少數幸運兒炒樓），講到筆者情緒低落，為市民長遠福祉嘅殞落抑鬱不歡！喺新政下，每年納稅人貼錢開「居屋賭局」隨時逾百億之數，較煲呔所提出嘅高等院校研究（50億）、自資專上教育基金（25億）、代繳公屋租金（19億）、額外社福津貼（19億）、內地市場基金（10億）、增醫護學額（2億）等等十多項利民開支仲要大！呢個咁大規模嘅資源錯配，唔係浪費又係乜嘢先？此外，繼振英哥喺施政報告後語不驚人誓不休，大開公營房屋期票，疑似復辟八萬五政策之餘，本周佢再為拉票向鄉議局發叔講咗啲後者認為「由心入面講出來，都聽得入耳」嘅鄉郊土地政策。為咗唔令市民知佢具體許諾嘅內容而民心生異（因為市民與鄉紳嘅利益多數係對立嘅：市區土地缺乏vs丁權無限膨脹、綠化地帶保育vs胡 亂起樓擴地、市區僭建嚴格執法vs鄉村怕死鬆手），我哋多數都唔會知道兩位「考慮競選特首」者為咗鄉議局支持而將自回歸拖拉至今嘅丁屋問題再縱容多幾多年。
拖延丁屋問題=未來特首延續不公
稍知歷史嘅讀者都明白，丁屋嘅歷史問題在於佢喺分配上、城市規劃上、土地效益上、都存在不公。
首先，一個喺荷蘭出世，從未返過香港，既無香港居留權，亦不識講中文嘅成年男丁，只要上咗某村嘅族譜，就算佢與香港嘅聯繫係幾咁牽強，都自動享受2100方呎嘅丁屋權利，導致動輒以數十萬販賣丁權（違背丁屋政策本意！）而發達嘅外國移民多不勝數，而喺本港捱貴樓兼交稅養新界基建嘅市民卻無福消受。據報道，鄉議局估計，合資格嘅男丁有24萬之眾，但係呢個數目當然會隨着每位男丁嘅生育而無限放大，直至永遠！所以一日政府唔解決丁屋呢個世襲福利問題，一日就係與市區港人過唔去（以有限土地資源去資助愈來愈多與港無關嘅人士），更遑論新界村內嘅原居民女性後人（性別歧視也）。政府一早應該將丁屋權益斷尾，如果唔 係，以後全港幾大嘅幅員都唔夠佢哋圈地！
第二，愈來愈多嘅丁屋地段被劣質發展商破壞殆盡，成為無空間、無特色、無設施、無價值、無前途嘅「港式貧民窟」【圖一】，乃香港城市規劃上嘅一大污點！政府既無計劃亦無手段嘗試為已做壞嘅村翻身（如增地積比作誘因去全村重建、無合理嘅環境配套唔批新屋牌、或資助村民回復昔日嘅傳統建築，創建新界嘅「新天地」或「宏村」【圖二】，為港增光），卻似乎仍然熱衷於大量批地俾人起呢啲礙眼嘅次級社區！
篇幅有限，暫此停筆。但從以上可見，對發叔嚟講「啱聽」嘅疑似候選人言語，可能係對六百多萬港人不利嘅政綱！而「雙英」係唔係絕對有責任話俾我哋知，佢哋代我哋割讓幾多整體市民嘅利益去換取鄉議局嘅選票？
中天
letstalkproperty@gmail.com
http://chungtinproperty.blogspot.com/
圖一：丁屋規劃毫無，設施欠奉，一片混亂，貧民窟不如
沒有留言:
發佈留言