2011年11月22日
土地政策失據 政府山之悲劇
過去一周喺土地房產領域有幾項值得評審嘅新聞，主要都係同土地供應同用途規劃有關，不得不講。「股壇長毛」David Webb嘅文章「賣地之干預與透明度」喺《信報》有覆蓋。
Webb言之有物，再中要害
長毛抨擊政府「限呎限量」賣地政策與筆者嘅分析（見拙文「限呎限量地政策對港人唔住」及「速拆三十萬細樓轉建大單位」）不謀而合，話呢個政策以加大置業率為目標，卻因長線冇增加供應而剝奪咗港人以較平呎價享用更多樓面呢個更重要嘅理想，以及令庫房亦蒙受損失。此外，為自己賣地有面，而將土地資訊黑箱化──以無人知道嘅標準決定邊幅地以資訊水份極低的招標方式出售，亦是極倒退嘅鬼祟行徑。
長毛提議除咗工業與非工業之分外，政府應該放棄事事俱管，甚至由發展商自己決定起住宅定寫字樓、商舖或酒店，充分發揮市場嘅資源分配力量，呢個係一個甚可取嘅建議，筆者亦希望下屆特首放膽去馬，解放呢個騎喺本港土地規劃／行政上嘅枷鎖，令市場更靈活適應千變萬化嘅需求。
筆者一向相信，政府良好意願嘅干預，往往製造更多市場扭曲及不公。喺市場無形之手下，可能會出現嘅價量曲線會係平滑而自我調節嘅【圖中藍線】：佢係與收入分 布掛鈎嘅、係樓換樓過程中無阻力嘅、係租與買之間無分別嘅，亦係最公平、公正、公開嘅資源分配方式，最能夠促進社會流動性嘅樓市結構。
可惜，政府干預下嘅樓市結構已被各項福利／政策劃分得四分五裂，阻力重重，不公處處：公屋令更多低層市民困喺白鴿籠內、夾心階層陷於居屋牢獄中，高收入人群卻受盡供應不足所致嘅高樓價痛苦【圖中紅線】，結果人人受害，政府多面不討好。
最後，長毛亦提議改革補地價方式，由一次過大額徵收改為長線徵收較高地租，咁既可活化地產市場（入場費低咗）亦穩定政府嘅財政收入。筆者可加一點，就係未來 業主嘅較高經常支出（因為每年地租水平會倍數上升）亦會催使佢哋更好地利用手頭嘅物業，而唔係丟空浪費咗寶貴嘅土地資源；政府未來亦更能收取貼近土地用途嘅稅費，直接得益於當時業主收入最大化行為嘅果實。
政府山畏縮不前，愈描愈醜
政府山重建宏圖喺弱勢政府嘅局面下，由林鄭月娥局長妥協又讓步，退縮兼失節，已經做出個四不像來，真係唔知再落去呢個怪獸會異變成點！本來用來紓緩商業樓面嚴重不足嘅供應，而家唔單止冇咗商場用途（官員們知唔知而家皇后大道中嘅地舖租金已去到1000蚊呎？唔起商場豈不是同稅收過唔去？豈不是將香港嘅競爭力丟落鹹水海？），更無腦到增加「政府和國際非政府組織用途」嘅樓面！呢個唔喺劣幣驅逐良幣係乜嘢？如果咁嘅規劃唔以「前門驅虎，後門引狼」嚟標籤就真係嘥咗！任何安插係香港最貴重土地中心地帶嘅官僚機構，如果支付低於市值租金，都形同喺度打市民嘅荷包，大家務必要小心警惕！
至於民主黨轉軚反對政府山賣地，則是佢區選失利舊患復發：為雞毛蒜皮嘅幾張選票做違背大眾利益嘅動作。請大家行過呢個筆者認為歷史／建築價值甚低嘅建築時駐足細觀，睇睇會唔會被佢建築嘅偉大同美感嘅超卓而感動得心跳涕流？
中天
letstalkproperty@gmail.com
http://chungtinproperty.blogspot.com/
