2011年11月15日
香港財政優勢盡顯 民粹可令前功盡廢
歐美政府支出過度，導致而家傳媒無日無之報道彼邦外債危機，實在係任何為民眾長遠福祉着想嘅政客／官員最佳警惕。然而，坊間有唔少分析描劃咗歐美地區嘅收支及債務情況，卻少與亞洲國家作比較，更遑論用時間序列分析嚟睇睇過去10、20年來嘅變化及趨勢。公共財政：亞洲審慎vs歐洲大花筒
由政府開支對國民生產總值呢個比例嚟睇，亞洲國家、特別係經濟較發達嘅幾個地域，一向審慎理財，政府開支一向唔超出兩成【圖一】。更值得一讚嘅就係呢個習慣喺1997亞洲金融風暴前後都係咁平穩，圖中唯一例外者係香港喺2002至03年經濟最危急之時，支出多於百分之二十兩年咁多，之後似乎繼續遵循港英年代留下嘅優秀傳統，以小政府原則量入為出。最新嘅數字都係喺2009年嘅19%，喺圖中穩坐優勢一方，與澳門、新加坡並駕齊驅！與此同時，韓國似乎開始愈使愈大，由2006年開始漸漸開支失控；相反地，瑞士卻愈戰愈勇，政府開支由1998年嘅27%撳到而家嘅17%之數，已經跑贏香港，隨時爬埋澳門嘅頭！
掉轉過嚟睇，世界其他地區就支出膨脹加速：環球比例由2002年嘅26%升至2009年嘅31%，美國、歐盟就更不在話下。最離譜者莫過於英國（36%漲至46%）及希臘（由42%飆到51%），難怪歐債危機一發難收！
私營財政哲學與政府態度亦步亦趨
原來私營板塊嘅花費／儲蓄習慣與公共部門相差不大：審慎理財嘅經濟體系亦係國民儲蓄率最高嘅地方：中國、新加坡在此力拔頭籌（澳門嘅高分數可能與超高嘅FDI流量有更大關係）【圖二】，儲蓄率長期高踞四、五成之多！相反，希臘同英國再度包尾，儲蓄率大步向百分之十以下推進！
可幸香港嘅儲蓄率企穩喺長線平均嘅三成多啲，與韓國同瑞士為鄰。可見本港整體市民仍然居安思危，未雨綢繆，就算歐債危機殺到嚟都會有現金應對（見拙文「港人錢多債少私樓買晒有找」）。此乃點解今次樓市調整一直非常細幅，而未來三至六個月只要大陸放鬆銀根，又或者歐債問題解決，更隨時會反彈！
新加坡在公在私，理財方面都較香江審慎。可惜而家香港政治氣候民粹日盛，由特首備選戰嚟睇，未來政府對經濟嘅干擾、對福利嘅濫放只會與日俱增，既增加社會嘅成本，最終步歐債危機後塵！至於香港政府實質開支係唔係大大高於圖一所見嘅兩成？篇幅所限，另文探討。
中天
letstalkproperty@gmail.com
http://chungtinproperty.blogspot.com/
