2011年3月29日
若要高鐵達港島 行人隧道不可少
上周講中環嘅行人天橋前景，今日就討論吓維港跨海行人隧道喺筆者夢想中可能出現嘅璀璨未來！眾所周知，規劃及運輸當局近年行為只醉心於為汽車奴役嘅心態下，愈來愈與行人同人力驅動（單車也！）嘅環保健康交通方式過唔去──西九龍大片貴重填海土地已被重重汽車道路及天橋包圍、瓜分得體無完膚，造成極大嘅社會資源浪費，甚至市民具體健康傷害，市民無緣步行至新嘅西九海旁，完全可以架空或下沉嘅公路卻霸道橫行，擠掉本來可作低密度發展嘅住宅／休憩空間，來往高速車輛嘅噪音（達80分貝）及廢氣，更對市民健康造成直接傷害……
依家好好一個西九「文化區」招標竟然變成「市區公園」招標，再令文化界同全港關心城市規劃嘅各界人士失望多次，睇嚟全民上街、重複七一遊行嘅「臨界點」確實係所距不遙！
喺咁嘅環境下，唯一能夠將西九呢個爛攤子起死回生嘅，就係採用「全環保、最健康、帶全球」呢條討好策略啦！筆者所指，係駁通未來高鐵站兼文化區嘅地下通道，建造世界最吸引（非衙門長處，要招標出去設計營運）、最環保健康，但仍然係最有效嘅海底隧道，連接港島上環至灣仔一帶。以下且描畫幾點具體提議嚟拋磚引玉，但能推動此運動向前已無憾矣。
世界上最吸引嘅過海隧道嘅設計元素可包括：
①超輕便電車：可出隧道後依特定路線上天（成為連接酒店、商廈一樓嘅快捷電梯）下地（直往地下鐵或地下單車場落客），甚至讓乘客自駕往未來嘅灣仔海旁，駐足觀景；車嘅大細可與哥爾夫球車相若，電源可與現有電車類似，以免充電問題之惱；
②水底透明管道：此世界第一也，使電車喺海底已可採用日光，甚至觀賞光纖送載嘅維港煙花鐳射燈光表演；此外，亦令香港更有動力早日回復海水清澈見底嘅光輝過去；
③綠化步行／單車層：超寬敞嘅行人隧道，令人感覺置身公園花圃，因流水花香圍繞而心曠神怡，而非困於鋼筋水泥壁壘之內，被慘綠燈管包圍，最終遭巨大隧道回音所殲剿！隧道內嘅綠化程度及隧道嘅寬度，應是與西九／灣仔海旁入口外之環境融為一體，彼此不分，循序漸進，直到已深入海底後，行人方才發覺！如此方能真正 連接兩大未來海濱公園於無形，為世界級都市所應達之人文城規高點；
④雙弧形走道：為更方便疏導人流，可考慮喺超輕便電車上岸嘅地點建兩條分岔管道，一條往上環西環（九龍則延至海旁去油麻地避風塘北端），另一條去金鐘灣仔（九龍則駁去南昌站，以減少北行嘅路上交通流量）。如此豈非比起更多嘅汽車路去紓緩無可紓緩嘅擠塞高明得多？
依家我哋需要嘅就係一個有魄力嘅領導，去做一啲我哋夢寐以求（又與過去汽車掛帥思維一刀兩斷）嘅，能夠喺五十年、一百年後依然自豪嘅，既環保、又美觀、更健體嘅基建，令香港呢個歐亞高速鐵路網終點站嘅「南天門」傲視寰宇。
中天
letstalkproperty@gmail.com
http://chungtinproperty.blogspot.com/
