2011年8月9日
政府非股神沽神樓神 儲備應還富於民
上個禮拜留下伏筆，欲本周大談點解政府應完璧歸趙，將本港巨額儲備還畀市民；點知標普降美國信用評級一事，竟將本文要提嘅論調更聚焦，更迫切化㖭！
眾所周知，真金白銀永遠係揸喺手上最稱心，擺喺銀行稍不放心（因有擠提風險），而託於基金公司就賭博面更大（因為有統計話，八成嘅基金經理跑輸大市也），再差嘅就係政府逼你去投放於基金公司嘅錢（因為唔單止費用驚人，表現更唔見得人……），最後，離自己荷包最遠嘅，莫過於政府經年累月咁由你血汗錢中抽走嘅，但係嚴格嚟講都仲係屬於自己嘅各類稅費啦（因為基金經理係邊個、投資策略對定錯、收費高低是否合理，我哋都無緣過問，更勿論管理）。
既然衙門已經坐擁大大超出審慎理財所需要嘅儲備（見上周拙文「施政報告應派錢 每人可袋八萬八」），咁喺而家環球金融生態咁唔穩定嘅情況下，就更應該還富於民，畀市民制訂自己嘅投資保值計劃，人各為己，謀求利益最大化，一定有效過留喺外滙基金入面，繼續死守危城（美元國債），抱着洩氣嘅水泡唔放。
先唔比較回報嘅落差，以下三點已顯示香港嘅外滙投資管理似落後他國。
第 一，喺回歸中國之後，「捍衞聯滙」已有一個更強大嘅靠山，基本上中國嘅儲備完全可以施阻嚇之效；除咗上周所提嘅貨幣基礎儲備，其他財政儲備應以鄰國競賽嘅心態搶先分散投資喺有資源、無負債嘅長線升值貨幣或資產上。呢一點大陸近年就做得非常出色，四出東征西討，買煤買油買農田，對沖愈趨嚴重嘅貨幣貶值潮。錢多得滯仍去買美債，貪佢「市場較深較流通」實乃守財奴嘅藉口也，君不見連索羅斯見投資回報難達標，都毅然退還投資者資金乎？
第二，喺資產配置上，特別係黃金，香港對債務危機、貨幣戰爭嘅敏感度幾乎係零。儘管我哋外儲世界排名第11位，但係喺黃金儲備上香港卻排第83位【表一】。雖然不至於如烏拉圭同智利咁，喺1999至2001年金價見底後盡沽手頭黃金，但係過去十年，本港又話商品交易中心，又話機場金庫，但係自己嘅黃金儲備上卻紋風不動！對比之下，醒目如死敵新加坡，竟喺同時間內把儲金「谷」到香港嘅60倍之多，更勁嘅當然非白俄、塔吉克、墨西哥莫屬，佢哋唔單止喺金價見底後大幅增持，更喺金融風暴後大手掃貨，仲再喺今年勢頭不對時大大加碼（買入7%至13倍之前儲備之多）！
第三，金管局最近竟然據報走到倫敦去投資地產，呢啲咁高風險嘅專門投資範疇又邊係一個監管部門應該做嘅呢？點解唔先將自己處於長線貶值嘅幣值先對沖咗先？點解喺一個央行狂印銀紙嘅時代，高坐於IFC頂層嘅各大官，竟安枕於香港黃金佔儲備比例排世界尾二【表二】呢個劣境？就算我哋嘅儲備達到世界各央行嘅中位數水平（即黃金佔儲備5.5%），香港都仲要增持手上存貨16倍（以現價計！），如果呢筆收購喺2008年落實嘅話，全港市民已經穩賺咗67億元，即每人分多960大元……
曾特首，你話喺唔喺應該快快派嗰8.8萬（19萬元當然更佳！）儲備畀返市民，由佢地去自求多福呢？
中天
letstalkproperty@gmail.com
http://chungtinproperty.blogspot.com/
2011年8月2日
施政報告應派錢每人可袋八萬八
由歐債危機到美債上限鬧劇，明眼人可見，俾錢政府去管，多數凶多吉少：納稅人嘅血汗錢喺民主國家通通被政客為「賄賂」選票而浪費喺無謂或低效嘅福利開支上，最終國家破產，民不聊生；而喺無民主嘅地方，就當然成為當權者嘅貪款私產，最終國家都係破產，人民亦無日好過，但就連一剎那嘅光輝都冇。
喺香港呢個民粹尚未泛濫成災、仍有殘餘港英「審慎理財、量入為出」思維之地，雖然有排都未致債台高築，但最近數年卻愈嚟愈向「國富民窮」嘅極端靠攏：每位市民所擁有但係掌控喺政府手上嘅外滙資產，由2007年嘅20.3萬元，大升至今年6月嘅34.3萬元有多，三年半間暴漲近七成【圖一】！
如剔除為「捍衞聯繫滙率」而必要備用嘅資金（理論上只須與貨幣基礎同值便可，如以M1計，約需1萬億元，如以流通貨幣計，仲更低至2400億元），政府嘅可動用財政儲備仍高達流通貨幣量嘅6倍，相對1993年嘅0.8倍，以及過去18年平均嘅3.6倍，都算大大鬆動【圖二，紫線】。
當然，外滙基金亦要應付政府運作上嘅不時之需，所以如果剔除聯滙儲備外，再剔除埋指引中相當於9至15個月政府開支嘅財政儲備，則剩下嘅餘錢理應回饋市民；但係政府自回歸後就不斷「自肥」，財政儲備相當於開支已由1996年嘅12個月，增至1998年嘅27個月，然後再抬高至今年嘅44個月【圖三，紫線】！
睇嚟財爺喺預算案時唔應該派6000蚊來惹公憤，而係派大大多於此數……就算以M1嘅125%同15個月財政支出為界，政府都可派每人8.8萬元─如果慷慨到極嘅話，呢個數目更可增至19萬元，都唔犯規！咁大數目，民憤又點有機會滋生呢？
而家曾特首仲有機會喺施政報告再派一輪，既還富於民，又斷下屆政府亂開福利嘅手尾，實行先將佢「小政府大市場」先，一舉多得也。
至於另一個點解要派錢嘅原因，篇幅所限，下次再談。
中天
letstalkproperty@gmail.com
http://chungtinproperty.blogspot.com/
2011年7月26日
十年政策蹉跎 土地供應失衡
講微觀供應講得多，今日就由非常宏觀嘅角度去探討過去十多年土地用途嘅變化及政策上嘅失誤，希望執政者能以此為鑑，為未來嘅土地資源分配作出理性及公平嘅抉擇，減少不必要嘅供求失衡，同時增加本港嘅經濟競爭力與宜居吸引力。
人云香港地少人多，此說有啱有唔啱。啱嘅當然喺指一個96%服務行業嘅城市，竟然只用0.4%嘅土地從事商業用途【圖一】，用以居住嘅土地則共佔6.9%之渺，唔怪得本港嘅寫字樓同住宅價格雙雙名列世界前茅！此亦為何筆者三番四次大聲疾呼要增加供應也。不過，筆者喺呼籲增加供應嘅同時，卻更愛本港綠油油一片嘅大好郊野（佔地七成有多），因為舉目珠三角，似乎只有香港呢一塊寶地仍然係如此青翠，相比深圳河以北「發展硬道理」下所塑造出嘅一片棕土灰地，真係唔知可愛幾多！
但係掉轉嚟講，地少人多之說亦有錯誤之處，因為只要加大市區地積比率同增加建築土地（可以填海及改變用途：如工業變住宅）來紓緩土地緊張，已可保育鄉郊綠野嘅，又令香港成為華南、甚至係亞洲嘅環保宜居之都……
雖然本港嘅住宅及商業土地稀少，但只要政府不遺餘力地增加供應都情有可原，可惜喺2000至2009年人口增長咗6%及本地生產總值上升咗22%嘅背景下，卻給人一個非常失望嘅情況：唔單止整體土地面積增長落後喺0.8%嘅水平，土地嘅供應與需求更是南轅北轍【圖二】：
①工業用地上升32%，相對於製造業經濟活動下降54%；
②鄉郊居所（即村屋也）暴漲30%，市區供起樓畀普羅市民嘅發展用地卻勁縮41%之巨！咁已經唔係政策失靈，而係高官失職──一個喺英國出世，唔識講中文，從未返過新界嘅男丁，竟然可以不動一條肌肉就憑其丁權起屋大賺數百萬；相反，一個喺本地出世、長大、交稅嘅市區港人，卻要飽受高地價政策下供樓之苦，咁社會又點會公平？貧富又點會唔懸殊？
③政府嘅「道路癡狂症」，及基建為上嘅施政方針亦表露無遺，道路用地大增20%，導致如青沙公路咁門可羅雀嘅道路大增，直接推動私家車增長及市區路面擠塞，最終仲要納稅人找數維修道路！
④雖然口口聲聲話大市場小政府，但係政府機構用地卻大增20%，至24平方公里之巨，大大拋離商業用地嘅4平方公里，與錯誤供地政策下，工業用地嘅25平方公里，不相伯仲！
希望未來我哋能見到政府／工業／道路／村屋土地回歸本位，而商業／住宅／鐵路／發展土儲有長足增長，則土地政策有救，香港有救爾。
中天
letstalkproperty@gmail.com
http://chungtinproperty.blogspot.com/
2011年7月19日
居屋唔影響樓市？唔該重修經濟科！
最近官員於房屋方面含糊其詞，即餵咗支持居屋復辟者食壯陽藥，令後者狀態大勇，鞭鞭有力！喺咁嘅大環境下，除咗少數頭腦清醒嘅學者外（如李兆富於6月30日壹周刊「置業既非福利亦非權利」文），民粹政客、業界牆頭草，甚至輿論幾乎一面倒出來合唱呢首紅歌；一時之間，居屋呢個經濟白痴但政治正確嘅殭屍，忽然再吹起復活作怪嘅陰風……
唯一喺呢個問題上可以原諒要跟大隊發聲嘅係地產建設商會（話「原則上不反對復建居屋」喎，但係你信咩？）因為佢哋知道無論點講道理，只要語調同民粹主流相悖，就可以永無寧日，被人日日喺公司總部圍剿「地產霸權」，以後想賣樓都幾難！
有民粹居屋復辟派人嘗試引經據典，話「過去幾十年喺居屋大量推出下，本港樓市都照樣向上升，可見居屋對樓市冇負面影響」。可惜咁嘅論調與「唔畀細路返學佢都長大」一樣咁自欺欺人。無錯，樓市因經濟增長照樣上升，但係個市嘅性質卻大大不同，就如街頭流連都會長大，但係有責任感嘅父母卻絕對唔會畀小朋友咁樣成長也！
有分析員以10個蘋果比喻居屋，就非常貼切：市場有100蚊購買力去負擔10個蘋果（即市價10蚊隻），但係政府為降低一小部分人嘅成本，於是規定3個要賣3蚊一隻，結果剩下嘅91蚊需求，就被迫放在7隻自由市場嘅蘋果上，導致市價升至13蚊一隻（相對原本市價升三成）；政府為咗「穩定」自己一手造成嘅高蘋果市價，於是加大福利力度，規定5隻蘋果要以3蚊隻嘅價去賣，最終導致自由市場上85蚊嘅需求，將單價推至17蚊隻（相對原市價升七成），比最初干預時更推高市價！餘此類推，直到政府全面擠走私人市場，整個市場嘅供求關係及定價機制完全被扭曲為止！
今日嘅「看圖識事」就用過去咁多年嘅私樓價與居屋供應規律嚟說明居屋唔單只好心做壞事，仲無意中加大樓市嘅波幅：每當樓價升幅較高嘅時候，即各房委大帝為政治考慮而加大建屋量之際【圖一，紅圈】，四年後嘅居屋落成量（以相對非公屋樓宇落成量的比例量度）亦創高峰【藍圈，可見紅、藍圈皆處圖一的同一邊】；可惜，居屋落成之年， 通常正是市況逆轉之時，甚至已達樓市循環嘅另一極端【圖二中，紅圈會處於藍圈嘅對立方，1998至2003年尤其顯著】！
可悲嘅係，呢種後知後覺嘅行為絕非回歸後政府嘅專利，從兩圖清晰可見，政府嘅良好意願幾乎無可倖免地，由80年代起就不停地重複：①
樓價飛升時搶走私人市場供應去建居屋（令私樓漲價動力更不可遏止）；②
樓市底部時大量居屋落成，加大價格下跌嘅風險。
喺樓市頂部錯失咗賣多啲貴地嘅機會之餘，更喺市底時賤價賣埋無人要嘅居屋單位出去，擲雙重納稅人嘅金錢落鹹水海！咁嚴重嘅害民機制，點解要復辟？唔該居屋支持者以良心辦事，莫令香港重入上周五羅家聰所指嘅「福利主義害人不淺」歧途！
中天
letstalkproperty@gmail.com
http://chungtinproperty.blogspot.com/
